الجواز وسنينه
بحلم
أحلام مشروعه
مرئيه ومسموعه
بحلم بيه
جاي من بعيد راكب الجمل ولابس بدله سودا سموكن
وأنا مستنيه ولابسه فستان أبيض بينور في الضلمه
وقلب هيفط من الفرحه
وموسيقا اتمخطري يا حلوه يا زينه
هتخرم طبلة ودني السليمه
منتهى الرومانسيه
وفجأه وبدون مقدمات
مقدرتش امسك نفسي وأعيش الدور اكتر من كده
عروسه وحركات وكده هوه
وبدأت الحوار المثمر
اتأخرت ليه يا بني ادم؟
انت عارف احنا في سنة كام دلوئتي
متقوليش الجمل عطل في السكه
وانك تهت في مجاهل افريقيا
والبنزين غلي والرخصه خلصت من كتر اللف في الشوارع
بلاش حجج فاضيه
انت عارف انا مستنيه بقالي كام سنه
بص في الساعه حضرته
ورمقني نظره
حاده جدا
بس على مين
طبعا رحت انا محمره عنيه
في زيت دره عالي الجوده اول قليه علشان الكوليستيرول
تقريبا مكنش مصدق نفسه واحول من الفرحه
وبدت عليه علامات الاسبهلال
مش عارفه ليه
قالي انتي ماهيتاب؟
ردت بكل ثقه لأ طبعا
ماهيتاب ازاي يعني
قالي
النمره غلط واضح انك مستنيه الجمل اللي ورايه
وخلص أول حلم
ولسه بحلم
وجملي لسه ماجاش
:)))))
فتافيت السكر
الى اللقاء في أحلام اخرى
وتصبحوا على خير
8 comments:
ميييييرااااااااااا
ضحكتينى ..... وقلبى خلاص حيقف من الضحك
ههههههههههههههههههههههههههههه
يا مفترية
قلبتى الحصان الابيض جمل
طب ما كده حلنى بقى على ما يشرخ
وحلوة اوى
ماهيتاب ازاى يعنى
انتى لسه بتسأليه؟؟؟
اقلبى ماهيتاب وخلصى نفسك
فعلا يا ميرا تميزتى فى اجابة التاج
طبعا دى اول حلقة فى اول سؤال
تصورى عجبنى تاجى اوى ..مكنتش واخدة بالى انه حلو كده هههههههههههه
مستنية باقى الافتكاسات
متتأخريش بقا تانى
بتوحشينى يا كميل
وبتفكرينى بزمان ...من سنة كده ...ماهو ده بقى زمان
وانتى عارفة الماضى دايما يبدو احلى
ربنا يسعد ايامك ويباركلك ونفرح كلنا فيكى وبيكى وكل الحاجات
سلام يا قمر
جاي من بعيد راكب الجمل ولابس بدله سودا سموكن
وأنا مستنيه ولابسه فستان أبيض بينور في الضلمه
-------------------------
بس مترصش تانى يا هرم هو كدة وصل...
معلش
انا جاي في الطريق
كنت عايز اديكي رنة بس الولية قالت عفوا نفذ رصيدكم
صحيح مش انتي شهيناز؟
شديدة دي يا فتافيت
ليكي عندي تاج جاهز على مدونتي
http://drmanosy.blogspot.com/
وبالهنا والشفا
مش تقوليلها يا جانا
جنى
:)
ربنا يفرح قلبك
ويريح بالك
"دعوةأمي"
بجد وحشتني المدونه
والرد على التعليقات والبوستات
والعيشه ديه
والناس
عارفه الغيبه كانت طويله
ياااااااه
عارفه البوست ده كان صعب اوي
اخدت وقت عقبال ما رجعت للمود تاني
أنا عارفه اني تحايلت وماجاوبتش على التاج زي الناس
بس بجد
أنا أحلامي واسعه جدا
من كتر وسعها وقعت مني ومش لاقياها
:)))))))))))))))
يعني حاولت أكتب اجابات عاديه
بحلم بكده وكده هوه
معرفتش
الطبع يغلب التطبع
ورجعت ريما لعادتها القديمه
بس متفتكريش اني احلامي كلها فانتازيا
أحلامي
كائن حي
يعشق الحريه
لو قيدتها في بوست تتخنق
:)
الاستاذ الغزالي
ياااااااااااااااااه
سلام صعيدي شحط محط من هنا لمصر الجديده
:)))))))
ازيك يا استاذ
أخبار الدنيا معاك ايه
يارب تكون بخير
مريت عندك لقيت قصه قصيره
ولأن قصصك محتاجه أن البني الدم يكون في كامل تركيزه أجلت قراتها
بس ان شاء الله
هتواجد من تاني وهنتشر في المدونات
:)
سلام مؤقت
البشمهندس فهد
:)
نورت في أول تواجد لك في مدونتنا
المتواضعه
ست البيت
:)
يا جماعه انا عندي حساسيه من التاجات
:)
اديكي شفتي أول تاج احاول أرد عليه
حصل ايه
مأساه
:)
المهم أنا بجد مبسوطه بتشريفك وتعليقك عندي في غيابي
أشكرك بشده وعنف
:)
ويارب دايما اشوفك
Post a Comment