Saturday, June 5, 2010

الطير المهاجر


نسيت التدوين

أو بالأحرى نسيت كيفية مشاركة الاخر أراء وأفكار شخصيه وأحيانا مشاعر وانفعالات داخليه في هيئة حروف مجوفه تشابكت لتنسج كلمه مكتوبه تمثل في وحدتها عجوز بلغت من العمر أرزله تعاني من أعراض انسحاب أحلام اليقظه تدمع عيناك لرؤيتها


وأحيانا ذات الحروف تغزل كلمات في جملتها ترسم شمسا في لوحه لسرب من الطيور المهاجره اختار أحدهم ان يطير وحيدا في اتجاه الشمس لحظة المغيب


أو ربما تنحت وجها لن تراه بعينك أبدا


أو تنبش ذكرى مدفونه في مجاهل عقلك



أتذكرالتدوين


كلمه واحساس


اشتقت لهذا الشعور


الشعور بالحريه وكأني طائر يسبح في الفضاء وحيدا


اتنفس الصعداء وأحملق في جدار الغرفه


أحلق في السماء



أعيش التدوين



يدق باب الغرفه



أهبط على الارض



اتساءل


هل يمكنني الطيران مره اخرى


اتشكك في ذلك


افتح الباب


اانظر الى السماء


ابتسم

Tuesday, June 24, 2008

تاج حياتي يا عين


ياصباح التاجات

أم جنى والله ماقصرت أيقظتني من تااااااااااااااج الأحلام

فتحت عيني

خير اللهم اجعله خير

لقيت


"تااااااااااااااااج: حياتي ياعين"


تنهيده طويله

يا فتاح ياعليم يا رزاق ياكريم


استعنا ع الشقا بالله

....................................


صباااااااااااااااااح الخير


في حلقه اليوم من برنامجكم المفضل" تاج حياتي ياعين" سنستضيف المدونه فتافيت السكر


والتي قررت بناء على رغبة الجمهور من المدونين والمدونات


كشف المستور


وستنشر أسرارعن حياتها خارج العالم التدويني


ولنتعرف سويا على "فتافيت السكر" التي لا يعرفها أحد


من أنت؟


.............................................


أنا

:)



اسمي" هبه" ولا أتوقع ان يثير هذا الاسم فضولكم أو يجعلكم ترتجفون هيبه وتوقيرا أو تفركون أكفكم في شغف


أنا مجرد شخص له كل مزايا وعيوب الاخرين


"مقوله مقتبسه من الكاتب الصحفي الاستاذ أسامه عبد الرحيم "

ولأن وراء كل اسم حكا يه

حكايتي مع الزمان

بدأت

بعد 9 شهور من الهرك و الفرك

وفي يوم 23 أكتوبر سنة 1982

تاريخ عجيب واقع بين برج الميزان و برج العقرب

على الشمال جنب البنك

أكبر" حدث"حصل فيه كان اني

قررت ان احضر الى الدنيا من باب الرخامه

أصل البني ادم طاقه بردو

والجو جوه كان خنأه بشكل فظيع ولأني كنت ومازلت أعشق الحريه

ولأني عنيده و لا أقبل الفشل

قررت

أن أحضر الى الدنيا من أضيق ابوابها

بسم الله الرحمن الرحيم

استعنا على الشقا بالله

العمر واحد والرب واحد

و تمت المهمه بحمد الله

و

بدأت أركز

أخدتني ست كبره وعرفت بعد كده انها جدتي

وسمعت الحوار الاتي

جدتي:بمنتهى العفويه والتلقائيه

معلش يا" سمير" بنت انا عارفه كان نفسك في ولد


أنا :صدرت أول واااااااااااااء اعتراضيه


وقلت في عقل بالي ياربي أنا جيت عند الكفار ولا ايه؟

يالله

ده مش بعيد يحفروا حفره وندفنيها دلوءتي

"طفله بأه ومتأثره بافلام الاشعه التلفزيونيه الخنيئه بتاعت أبو لهب وحنظله "

بابا:يا حجه انتي بتتكلمي في ايه

ديه "هبه" من الله

أزعل ازاي بنت أو ولد كله نعمه من ربنا

أنا :"وااااااااااااااااء من الفرحه

بصراحه انا كنت قلقانه تكبر في مخه و يسميني "نعمه" وبعدين ندفينها بردو

وربنا ستر

ومن وقتها أصبح وأمسى اسم هبه و سمير

اسم واحد لا يتجزأ

زي فريد وشوقي و أحمد ورمزي

:))))))

طفولتي شقيه جدا

اعتمدت على نفسي بدري

عشريه و بحب الناس

.................................................

معانا مداخله تليفونيه من واحده من صحاباتك


علا:صاحبتي من أيام الاعدادي فقريه موت


هبه ديه طيبه جدا لدرجه احيانا تميل الى العبط

سمراء و قلبها أبيض

جدعه

صاحبة صاحبتها

تقدر تقول كده بنت بمية راجل لكن اذا جه الراجل................ :)))))))))))))))) مش بقولكم علا ديه فقريه جدا

أنا :كفايه يا علا اقفلي يا حبيبتي

المكالمه على حسابك

أقول ايه تاني عن نفسي

عصبيه و حمئيه

بحب ربنا

وعلى فكره

دكتورة أطفال

ومحدش يقولي بكره تكبري :)))))))))

رومانسيه و مع نفسي كده ومحدش يحب يشوفني وانا بتفرج على فيلم عاتشفي

لأني بقعد اسح

طموحه

"أحلى طاقة نور بتنور دنيتي "أمي


في النهايه

أنا

بشر

يذنب ويتوب

يرحل ويعود

يعيش ثم يموت

هبه سمير

Tuesday, May 27, 2008

مصري بشرطه


البرنامج:90 دقيقه حلقة 27 مايو 2008

الموضوع :ازاي الناس تعيش في مصر؟

الحدث :مكالمه تليفونيه مع عم صالح من المنصوره

عم صالح فاض بيه

قال في وش الحكومه

"ياخد الألف جنيه معاش ويوريني هيعيش بيهم ازاي"

"ولا هوه مصري وأنا مصري بشرطه"

......

أقولك ايه يا عم صالح وكلنا صالح

"أنت مش مصري بشرطه وبس انت مصري بشرطه و"نقطة

ومن أول السطر

...............

اه يا بلد

Monday, May 19, 2008

أحلام فانتازيا


الأمومه

أحلامي مشروعه

مرئيه ومسموعه

بحلم

حلم فسيولوجي جدا

بحلم

"ب "كلمه

واحساس


"احلم معايا".....................

كائن حي صغير الحجم ملامحه تشبه أبوه بشكل مستفز

راكب على ضهري

ومتعلق في رقبتي

وصبباع صغير بيحاول يشق طريقه الى فتحة مناخيري بعد ما درس تضاريس وشي من الناحية التشريحيه بعنايه

للمرة الواحد وعشرين بعد المئه


ماما

مااااما

ماااااااااما

ماااااااااااااااما

ماااااااااااااااااااااااما


ايه

في ايه

كله ماما ماما ماما

مفيش بابا خالص


شوف يا بني

شايف الراجل المحترم المثقف اللي متبني الجرنال هناك

ده اسمه بابا


رووووووح قوله

اتبناني


ماشي يا حبيبي


راح ورجع في أقل من ثانيه

ماااااااااااما

مااااااااااااااما

ماااااااااااااااااما


نعم

وسرينه من العياططططططططططططططططط

شبه عليه صوت عربية الاسعاف


مالك ياحبيبي بس

خلاص طيب واخدته في حضني


بابا مش عايز يتبناني يا ماما

مقدرتش امسك نفسي من الضحك

ونويت لابوه عل نيه سودا

وياريت الموضوع خلص لحد كده

الواد ماصدق وهاتك يا أسئله من ماركة

يعني ايه تبني ؟

وانتي خلفتيني ازاي وليه وفين ومنين؟

ليه طنط منى اتجوزت ؟

والنجوم ليه مش بتقع؟

والقمر ليه بيجي بالليل بس؟

هوه البحر كبير اوي؟

والخ الخ الخ..............الخ

وبعد مناقشه طويله

دماغي ورمت وتعبت


باسني بوسه كبيره جدا

وقالي أنا بحبك اوي يا ماما

:حضنته وقلت له

وأنا كمان

بحبك اوي

اد النجوم اللي مش بتقع

والقمر اللي بينور بالليل بس

و البحر الكبير اوي


الى اللقاء في أحلام اخرى

وتصبحوا على خير

فتافيت السكر:)







Saturday, May 17, 2008

أحلام فانتازيا


الجواز وسنينه

بحلم


أحلام مشروعه

مرئيه ومسموعه


بحلم بيه


جاي من بعيد راكب الجمل ولابس بدله سودا سموكن

وأنا مستنيه ولابسه فستان أبيض بينور في الضلمه

وقلب هيفط من الفرحه

وموسيقا اتمخطري يا حلوه يا زينه


هتخرم طبلة ودني السليمه

منتهى الرومانسيه

وفجأه وبدون مقدمات

مقدرتش امسك نفسي وأعيش الدور اكتر من كده


عروسه وحركات وكده هوه


وبدأت الحوار المثمر

اتأخرت ليه يا بني ادم؟

انت عارف احنا في سنة كام دلوئتي

متقوليش الجمل عطل في السكه

وانك تهت في مجاهل افريقيا

والبنزين غلي والرخصه خلصت من كتر اللف في الشوارع

بلاش حجج فاضيه

انت عارف انا مستنيه بقالي كام سنه

بص في الساعه حضرته

ورمقني نظره


حاده جدا


بس على مين


طبعا رحت انا محمره عنيه


في زيت دره عالي الجوده اول قليه علشان الكوليستيرول

تقريبا مكنش مصدق نفسه واحول من الفرحه

وبدت عليه علامات الاسبهلال

مش عارفه ليه

قالي انتي ماهيتاب؟

ردت بكل ثقه لأ طبعا

ماهيتاب ازاي يعني


قالي


النمره غلط واضح انك مستنيه الجمل اللي ورايه


وخلص أول حلم




ولسه بحلم
وجملي لسه ماجاش


:)))))


فتافيت السكر
الى اللقاء في أحلام اخرى
وتصبحوا على خير



















Thursday, January 10, 2008

ملعون صوت السكات



"الصوت العالي دليل على ضعف الشخصيه"


قول مأثور عن الحكومه


فتحت عيني لأجده مطبوع على الغلاف الخارجي لكتب الوزاره في كافة مراحل التعليم الأساسي


ومن شب على شئ شاب عليه تركت العنان لخيالي


:وتفتق ذهني عن الاتي


....... فرمان رقم 10988 عن الوالي


صدر عندما مر الوالي ليتفقد حال الرعيه الفلاحين وسمع صوت همس فلاح فأمر بشنقه وأقام مذبحة القلعه وقال كلمته الشهيره


الصوت العالي دليل على ضعف الشخصيه أدب يك خرتيت" ونظر نظره سخريه للفلاحين"


وأصدر فرمان بكتابة تلك المقوله الأثريه على كافة كتب الوزاره








أو ربما كان أمر وزاري في حكومة.....باشا رحمه الله


عندما كان متواطأ مع اخوانا في بريطانيا العظمى وصدر عن مجموعه من الرعاع الوطنين أصوات شجب


واستنكار فأمر بفتح المندل وعرف اسمائهم و عنواينهم قام باعدامهم جميعا في ميدان عام


بتهمة الصوت العالي والتواطؤ ضد مصلحة البلد


وقلع طربوش سيادته ومسك جزمته في ايده وقال كلمته المشهوره


"الصوت العالي دليل على ضعف الشخصيه يا كلاب"


التي أمر بكتابتها على كتب الوزاره حتى يتذكره الكلاب بكل الخير






أو ربما كانت كلمة السيد صلاح نصر


الاخيره قبل أن يذهب الى مثواه الاخير




حتى لا ينساه رواد المعتقل الصحي






أويمكن كلمة اسلام نبيه للسجين بعد أن أمر بهتك عرضه


أو أو أو












قرار بالغاء الدعم






قرار بخصخصة مستشفيات التأمين






قرار باغتيال الفقراء








اسمحولي هصوت بس بصوت واطي


حفاظا على قوة شخصيتي


لكني وجدت ان حتى حق التصويت أصبح مقصور على مشاهدي برنامج ستار أكاديمي


وأصبح وأمسى


الصوت الوحيد المسموح والمسموع عزيزي المواطن هو


صوت السكااااااااااات






Tuesday, November 27, 2007

تمرد


:قالت




لن يرسم كفي بصماتك


لن تشغل حيز من عقلي أفكارك


لن تتحقق في مخيلتي أحلامك


لن تطربني في العشق كلماتك




لن يهزمني فشلك


ولن أرقص فرحا بانتصاراتك





هل تدرك ذلك؟

بالأمس

قتلت بالغدر أشواقي

واليوم

فلتحيا وحيدا خلف أسوارك

أما الغد


فلتمت ذكراي بين أسرارك


مع خالص تحياتي