سألني بكل براءه وتلقائيه عن
النسيان
هو احنا ليه بنحمد ربنا ونقول عليه نعمه
ونرجع نقول انه وحش
يعني النسيان وحش ولا كويس
غريب حالنا يابني ادمين
وسكت
شوف
والشوف مش نظر ,الشوف وجهة نظر
ماغريب الا الشيطان
النسيان وحش وحلو وساعات محرج وأوقات مبهج وأحيان محزن وبيضيع ويودي في داهيه وبيقلب بزهايمر وضار جدا بالصحه ويؤدي الى الوفاه
هههههههه
مش اعلان سجاير
بس هيه ديه الحقيقه
نتكلم عن حلاوته
اااااااه
بجد النسيان نعمه
يعني مثلا لو افتكرت ايام طفولتي السعيده جدا
لما نزلت ألعب في الشارع مع ولاد الجيران
عادي يعني بتحصل في أحسن العائلات
وأخدت معاياه عروستي الانتيم
كانت عروسه بنت ناس جدا
طول بعرض بارتفاع
كانت طولي ساعتها أيا م لما كنت صغننه
ولعبت وبعدين طلعت وسيبتها
وولاد الحلال كتير
واختفت العروسه تقولش مشيت لوحدها
وقلبتها مناحه طبعا
ومتخيلتش حياتي من غير العروسه
المناحه استمرت خمس دقايق تقريبا بالتوقيت الصيفي
انتهت بحضن حنين وشيكولاته
ونسيت
بس ميضرش لو خليته في صندوق الدنيا علشان افتكره مع نفسي واضحك
النسيان نعمه
يعني اتخيل لو انا لسه فاكره حزني علىوفاه جدتي الله يرحمها
كان زماني لسه حابسه نفسي في اوضتي
ومش عايزه أكلم حد
ومش هقدر أعيش من غيرها
ونسيت
وعيشت
نسيت ازاي احبها زي الأول
ونسيت تفاصيل كتير
لسه بفتكر جدتي وبحبها
ده مش تناقض
بس كان لازم أنسى علشان أعيش
ونسيت بمزاجي وغصب عني
النسيان نعمه
تفاصيل كتير في حياتي نسيتها و تروح صندوق الدنيا ساعات افتكرها طشاش
وفي تفاصيل بتتمسح باستكيه وكأن شيئا لم يكن
.....
النسيان وحش اوييييييييييي
أبسطها في الامتحانات
لما ننسى اجابه وساعات اجابات
وأصعبها
لما ننسى احنا عايشين ليه
لما ننسى ربنا
الثواب والعقاب
لما ننسى أحلامنا
طموحاتنا
أهدافنا
لما ننسى أقرب الناس لينا أهالينا
لما ننسى أصلنا والله يرحمك يا جدي
لما ننسى ازاي نحب
ازاي نفرح
لما ننسى ازاي ننسى أحزانا
ازاي نستمتع
ازاي نضحك من قلبنا
ازاي نسامح ونغفر
لما ننسى ازاي نعيش
لما ننسى نفسنا
ونتنسي
............
النسيان محرج جدا جدا جدا
لما اقابل واحده صاحبتي من زمان والكارثه لو حد قريبي من بعيد
واحاول افتكر في الاسم
واتوووه
ازيك يا حبيبتي عامله ايه؟
فاكره نفسي ناصحه
بس على مين
في ناس بطنش
وفي ناس بتهيص
انتي مش فاكره اسمي ولا ايه؟
طبعا وشي يجيب الوان الطيف كلها
ونسيت
نسيت الموقف كان مع مين وفين وليه
وفي الاخر برده الحمد لله
.........
الزهايمر
مرض العصر
اللي بنجيب سيرته كتير في كلامنا بهزار وتريأه
بس في الحقيقه انه مرض مؤلم ومحزن ومرعب
وربنا يشفي كل مريض
المرض صحيح بيجي أكتر للمعمرين فوق سن خمسه وستين
في أمريكا والدول المتقدمه
أما الدول الناميه زي حالتنا بتموت بدري بدري
بتموت من الجوع بتموت محروق دمها وضغطها عالي
تموت من السكر الزياده
تموت من القهر
لكن تموت من النسيان
لسه شويه
الناس الغلابه اتعلمت تنسى علشان تعيش
المشكله أنه مرض ملوش سبب
كلها نظريات
بتقول انه ضمور في خلايا المخ
أو تغيرات تصيب تلافيف الدماغ
مقدروش يصنفوه ضمن أمراض الشيخوخه
لأنه بيجي للشباب
يعني كل واحد يخلي باله من تلافيفه
.........
انسى انسى
بس متنساش كل حاجه
انسى بحساب
اقولك
انسى اللي قولته
انساني
وتنساني ليه
انساك أنا
:)
قلبك
