Tuesday, June 24, 2008

تاج حياتي يا عين


ياصباح التاجات

أم جنى والله ماقصرت أيقظتني من تااااااااااااااج الأحلام

فتحت عيني

خير اللهم اجعله خير

لقيت


"تااااااااااااااااج: حياتي ياعين"


تنهيده طويله

يا فتاح ياعليم يا رزاق ياكريم


استعنا ع الشقا بالله

....................................


صباااااااااااااااااح الخير


في حلقه اليوم من برنامجكم المفضل" تاج حياتي ياعين" سنستضيف المدونه فتافيت السكر


والتي قررت بناء على رغبة الجمهور من المدونين والمدونات


كشف المستور


وستنشر أسرارعن حياتها خارج العالم التدويني


ولنتعرف سويا على "فتافيت السكر" التي لا يعرفها أحد


من أنت؟


.............................................


أنا

:)



اسمي" هبه" ولا أتوقع ان يثير هذا الاسم فضولكم أو يجعلكم ترتجفون هيبه وتوقيرا أو تفركون أكفكم في شغف


أنا مجرد شخص له كل مزايا وعيوب الاخرين


"مقوله مقتبسه من الكاتب الصحفي الاستاذ أسامه عبد الرحيم "

ولأن وراء كل اسم حكا يه

حكايتي مع الزمان

بدأت

بعد 9 شهور من الهرك و الفرك

وفي يوم 23 أكتوبر سنة 1982

تاريخ عجيب واقع بين برج الميزان و برج العقرب

على الشمال جنب البنك

أكبر" حدث"حصل فيه كان اني

قررت ان احضر الى الدنيا من باب الرخامه

أصل البني ادم طاقه بردو

والجو جوه كان خنأه بشكل فظيع ولأني كنت ومازلت أعشق الحريه

ولأني عنيده و لا أقبل الفشل

قررت

أن أحضر الى الدنيا من أضيق ابوابها

بسم الله الرحمن الرحيم

استعنا على الشقا بالله

العمر واحد والرب واحد

و تمت المهمه بحمد الله

و

بدأت أركز

أخدتني ست كبره وعرفت بعد كده انها جدتي

وسمعت الحوار الاتي

جدتي:بمنتهى العفويه والتلقائيه

معلش يا" سمير" بنت انا عارفه كان نفسك في ولد


أنا :صدرت أول واااااااااااااء اعتراضيه


وقلت في عقل بالي ياربي أنا جيت عند الكفار ولا ايه؟

يالله

ده مش بعيد يحفروا حفره وندفنيها دلوءتي

"طفله بأه ومتأثره بافلام الاشعه التلفزيونيه الخنيئه بتاعت أبو لهب وحنظله "

بابا:يا حجه انتي بتتكلمي في ايه

ديه "هبه" من الله

أزعل ازاي بنت أو ولد كله نعمه من ربنا

أنا :"وااااااااااااااااء من الفرحه

بصراحه انا كنت قلقانه تكبر في مخه و يسميني "نعمه" وبعدين ندفينها بردو

وربنا ستر

ومن وقتها أصبح وأمسى اسم هبه و سمير

اسم واحد لا يتجزأ

زي فريد وشوقي و أحمد ورمزي

:))))))

طفولتي شقيه جدا

اعتمدت على نفسي بدري

عشريه و بحب الناس

.................................................

معانا مداخله تليفونيه من واحده من صحاباتك


علا:صاحبتي من أيام الاعدادي فقريه موت


هبه ديه طيبه جدا لدرجه احيانا تميل الى العبط

سمراء و قلبها أبيض

جدعه

صاحبة صاحبتها

تقدر تقول كده بنت بمية راجل لكن اذا جه الراجل................ :)))))))))))))))) مش بقولكم علا ديه فقريه جدا

أنا :كفايه يا علا اقفلي يا حبيبتي

المكالمه على حسابك

أقول ايه تاني عن نفسي

عصبيه و حمئيه

بحب ربنا

وعلى فكره

دكتورة أطفال

ومحدش يقولي بكره تكبري :)))))))))

رومانسيه و مع نفسي كده ومحدش يحب يشوفني وانا بتفرج على فيلم عاتشفي

لأني بقعد اسح

طموحه

"أحلى طاقة نور بتنور دنيتي "أمي


في النهايه

أنا

بشر

يذنب ويتوب

يرحل ويعود

يعيش ثم يموت

هبه سمير

24 comments:

عصفور المدينة said...

الإجابات جميلة ولكن الخاتمة أجمل

Jana said...

هو ده الايجاز الذى يوضح المعنى بانجاز
اللى لا أتقنه ابدا
وأغبطك بصراحة عليه

اخيرا حاقول يا هبة ومارجعش امسح الكومنت خوفا من افشاء سر حضرتكم الرهيب
انما كده بقى نقول يا هوبة وناخد راحتنا

مقولة سمسم الشهيرة هى احلى ما بدأتى به ...فدائما أجدها جملة معبرة عن حكمة صاحبها

كالعادة متميزة فى اسلوب تناولك للاجابة ...فتصبح اكثر اثارة ومتعة

طيبة وجدعة ...أى نعم وأشهد لكِ بذلك
موضوع العبط ...لسه مجربتوش لحد دلوقتى
ههههههههههههههه

طموحة .. وحقا مجتهدة ..ربنا يوفقك ويكرمك وينفع بكِ

عشرية وبتحبى الناس ... شفت بنفسى محدش قاللى
اضافة بقى...والناس بتحبك أكتر

دكتورة أطفال ..افتحى عيادتك فى اسكندرية ..ووجبى مع أختك

رومانسية ...حضرى الكلينكس ..انا جاية

عصبية وحمئية ...انتى مين يابنتى..هبة مين؟؟ انا معرفكيش ...فين ميرا ؟؟؟

ربنا يحفظلك مامتك وكل ذويكِ ويباركلكم فى بعض وفيمن تحبى

امتى عمو سمير ناوى يصيف عندنا بقى؟؟؟
:))))

ختام كلامك .. لا أفسد روعته بتعقيب عليه

عاشــــــ النقاب ـقــــة"نونو" said...

فتافيت سكر فعلا
ربنا يبارك فيكي
شخصية رقيقة شقية لازم تتحب
بس بجد دكتورة اطفال
والله كويس اوي
بكرة تكبري
هههههههههههههههههههههه
لازم تضيفيني على ما سنجرك
احتاج لمشوراتك من ان لاخر
عندي 4 عيال وفي منطقة جديدة ولما عيل بيتعب بضطر اسافربيه
فتلحقيني
ينوبك ثواب لو بعد الشر يعني حاجة كدة ولا كدة
وهنية لك يا فاعل الخير
ههههههههههههه
nonoymm
دة ميلي ومنتظرة الاضافة
احبك في الله
تحياتي

MiraMar said...

عصفور المدينه
ربنا يكرمك يا بشمهندس محمد
يارب فعلا الخاتمه تكون أجمل
اللهم ارزقنا حسن الخاتمه
نورت
:)

Ahmed Kamal said...

فتافيت السكر بتاعتك يا دكتورة خلتني أفرح و ابتسم من الكلام "الحلو" :)

و رغم إنك عصبية زي ما بتقولي لكن واضح إن الغزالة لما تروق بتبقي مرحة ، و واضح كمان إنك من النوع المتحمس ، و رغم إنك رومانسية إلا إنك واضحة و صريحة ..

الحقيقة أنا عمال أكتشف حاجات من تاج حياتك ماقولتيهاش صراحة ، بس باقول مافيش داعي أقول أكتر من كده ..

ألا بالحق يا دكتورة هبة لما ولد عنده سنتين يسخن و يرجع بعد .. ولا أقول لك هنا مش مجال استشارات طبية .. :) طيب إيه رأيك في مدونة استشارات أطفال ؟ أضمن لك نص المدونين حايبقو زباين عندك :)

تحياتي

MiraMar said...

أختي وحبيبتي أم جنى
ياكسوفي يا كسوفي
:)
أخجلتم تواضعنا
:)
على فكره ان شاء الله انا لازم هاجي اسكندريه في يوما ما
الاول كان الواحد بيروح يصيف بس ويحس بالغربه وميعرفش حد, دلوءتي الواحد بقاله ضهر في اسكندريه
لو مرتحش علشان اصيف اكيد هروح علشان اشوف الناس اللي بحبهم
:)

ربنا يكرمك ويبارك فيكي

MiraMar said...

نونو
:)
ربنا يكرمك ويبارك لك في اولادك امين
انتي تأمري يا ستي
هضيفيك ان شاء الله
انا أتأخرت في الرد بس انشغلت شويه و النت كان فاصل
معلش سامحيني
سلام عليكم
ياجميل
وسلمي على الولاد
:)

MiraMar said...

أستاذ أحمد كمال
:)
الله يكرمك
والله متشكره اوي
انا بغضب اوقات بس في الحق والله
الغضب الذي لا يضر الا صاحبه
بدون الاضرار بالاخرين
:)
يعني جايه عليه بخساره
ربنا يستر
وأي استشاره طبيه
طفوليه
نحن في خدمة المدونين والمدونات
:)

ست البيت said...

جميلة انت يا هبة
واجاباتك نوذجية 10/10جانا بعتتلي التاج دا ومعرفتش ابتدي منين الحكاية
ححاول والله المستعان

.:.-=- ELGaZaLy-=-.:. said...

الخاتمة قوية بحق...واجباتك موجزة وشاملة فى نفس الوقت جميلة

حسن ارابيسك said...

ميرامار
اتمنى تكوني بخير
وكنت اتمنى أن اجد بوست من حاجاتك المهمة
لكن لاقيت بطاقه شخصية جميلة لكي اتمنى لها المزيد في المستقبل في السي في ان شاء الله
خاتمة البطاقة رائعة بجد
تحياتي
حسن ارابيسك

MiraMar said...

ست البيت
اشكرك بشده
ربنا يكرمك
اسفه للتأخير في الرد
سامحيني

MiraMar said...

حسن ارابيسك
يااااااااااااااااااه
انت فين من زمان
او يمكن انا اللي فين
:)
انا مقصره بشده في حق المدونه
اشكرك على السؤال
انا بخير الحمد لله

MiraMar said...

الاستاذ الغزالي
اشكرك لمرورك واسفه على تأخير الرد
يارب تكون بخير
:)

Jack Sparrow said...

اجمل مدونة زرتها منذ فترة هي مدونتك يا هبة

خفيفة الظل و الدم بطريقة مرعبة

اسمي" هبه" ولا أتوقع ان يثير هذا الاسم فضولكم أو يجعلكم ترتجفون هيبه وتوقيرا أو تفركون أكفكم في شغف

أنا مجرد شخص له كل مزايا وعيوب الاخرين

المقطع ده بالذات لا يمكن انساه
و اعتقد انه من تأليف الدكتور احمد خالد توفيق
في رواية اسطورة بيت الافاعي بالتحديد
لا اعرف الكاتب اسامه عبد الرحيم و لكني لا اتهمه بالاقتباس مثلا و ربما كان احمد خالد توفيق هو المقتبس
لكن روايته كانت من اكثر من ثلاث سنوات

ارجو ان اعرف تاريخ مقالة استاذ اسامه بالظبط

و آسف اني خرجت عن الموضوع

Anonymous said...
This comment has been removed by a blog administrator.
L.G. said...

هبة
كل سنة وانت طيبة بس 2008

انت فين وأميرة البلطجية برضه فين ياريت لو تعرفي الميل بتاعها تقولليلي عليه أو تخليها تدخل مدونتي بس اطمن عليها

ليه مكتبتيش من شهور لعل المانع خير

Cute Kitty **sookra said...

يااااااااااااااااااااه
بقى ادخل موش الاقيكى
طيب انتى قدمتى التاج بطريقه تحفه بجد
اجاباتك جميله وخفيفه
ارجعى بقى

max.adams said...

جميل أن الواحد يعبر عن نفسه
و الأجمل طريقة التعبير الرائعة دي
تسلمي

max.adams said...

حاجه تانيه برا الموضوع

فينِك ، (اللعبة هنكتب كلنا قصة )وقفت في الحلة الرابعة ليه و محدش كمل ؟؟
أرجوكِ تردي عليا

Unknown said...

جميلة جدا الصورة .. حبل الغسيل رائع
وات إلس يا مشمش وات إلس؟ اهه


والتاج عبقرى.. باين كده حنعينك مذيعة فى البلاط الملكى

MiraMar said...

مشمش :)
اتيسطت جدا لما لقيت تعليق على تاج كتبته من سنتين
ورجعت قريت التاج من أول وجديد وقعدت اضحك
:)
كأن شخص تاني اللي كتبه مش أنا
عرفت اد ايه ان الثابت الوحيد ف حياتنا هوه التغيير
انا قبلت وظيفه مذيعه بس انت قديم أوي زي البوست بتاعي
دلؤتي بأه اسمه "السيراميك الملكي"أو بالعنجليزي"ceramica Royal"
ومهند هظبطنا

اعلانات عنه ف التفلزيون:)
نورت البلوج يا مشمش
:)

Unknown said...

انا كدة إتلغبطت, جيت أعمل أبديت للداتا إللى عندى لقيت إسمها البورسيلين الملكى
:P
_______________________________

وبعدين إيه حكاية مهند .. المصرى يكسب

_______________________________
أصل أنا بقالى مدة بعيد عن التدوين و لفيت لفه على البلوجات إللى كنت متعود ازورها و لقيت فى البلوج بتاعك أجدد حاجه من سنتين , قولت لو إستنيت البوست الجديدة ممكن أطول حبتين .. بس بصراحة متوقعتش رد على الكومنت

أتمنى لما أجى اشوف الرد ألاقى بوست جديدة أعلق عليها

نادى الاخبار said...

جميل جدا جدا
شكرا لك